នៅប្រទេសហ្ស៊កហ្ស៊ី ទើបតែមានរឿងធំមួយកើតឡើង! តុលាការក្រុងទីប៊ីលីស៊ី បានសម្រេចផ្ដន្ទាទោសអតីតប្រធានភ្នាក់ងារសន្តិសុខជាតិ លោក Grigol Liluashvili ឲ្យជាប់គុក ១៣ ឆ្នាំពេញ ពីបទស៊ីសំណូកសរុបជាង ២ លានដុល្លារ។ តំណែងជាអ្នកចាប់ចោរ សោះប្រែជាលូកដៃស៊ីសំណូកក្រាស់ជាងគេទៅវិញ។
តាមភស្តុតាងដែលតុលាការទទួលបាន ក្នុងចន្លោះឆ្នាំ ២០២១ ដល់ឆ្នាំ ២០២២ គ្រាន់តែលុយថ្លៃ "កាងការពារ" លោកប្រមូលបានរហូតដល់ ១,៣៦៥,០០០ ដុល្លារ។ កាលណោះ នៅក្រុងទីប៊ីលីស៊ី មានក្រុមបណ្តាញឆបោកតាមទូរស័ព្ទ (Call Center) មួយ ហើយរូបលោកហ្នឹងហើយ ជាអ្នកឈរពីក្រោយខ្នងចាំកាងឲ្យគេ។ មិនតែប៉ុណ្ណោះ ក្នុងអំឡុងពេលនោះ លោកក៏បានទទួលលុយពីថៅកែ Xu មកពីតៃវ៉ាន់ទៀតផង។ ប្រជាជនរត់ការធ្វើការយប់ព្រលប់ហត់ស្ទើរងាប់ ឯពួកគាត់អង្គុយតែក្នុងម៉ាស៊ីនត្រជាក់ ចែកលុយធំធ្វើព្រងើយ។
ក្រៅពីកាងបណ្តាញឆបោក លោក Liluashvili មិនរំលងសូម្បីតែគម្រោងថាមពលខ្យល់ ឧស្ម័ន និងគម្រោងទិញទំនិញរបស់រដ្ឋ គឺប្រមូលលុយជើងសារ និងភាគរយកាត់ក្បាលក្រកស្ទើរគ្រប់កន្លែង។ នៅតាមតូបកាហ្វេ ម្នាក់ៗជជែកគ្នាក្តៅគគុកថា មនុស្សម្នាក់នេះស៊ីមិនរើសមុខមែន លុយស្អីក៏ហ៊ានយកដែរ។ ឥឡូវត្រូវតុលាការផ្តន្ទាទោសហើយ ជាប់គុក ១៣ ឆ្នាំនេះ ច្បាស់ជាដេកស្ដាយក្រោយនៅក្នុងទ្រុងជាមិនខាន។
