នៅក្នុងសន្និសីទអាកាសចរណ៍អាស៊ីប៉ាស៊ីហ្វិក ដែលបានរៀបចំឡើងនៅទីក្រុងកូឡាឡាំពួរ រដ្ឋមន្ត្រីទទួលបន្ទុកអាកាសចរណ៍ស៊ីវិលកម្ពុជាបានឱ្យដឹងថា កម្ពុជាកំពុងតែខិតខំប្រឹងប្រែងកែលម្អ និងលើកកម្ពស់កម្រិតព្រលានយន្តហោះក្នុងស្រុក ឱ្យទាន់ស្តង់ដារអន្តរជាតិ។ ការអភិវឌ្ឍនេះផ្តោតសំខាន់លើព្រលានយន្តហោះធំៗចំនួនបី គឺនៅរាជធានីភ្នំពេញ ខេត្តសៀមរាប និងខេត្តព្រះសីហនុ ដើម្បីត្រៀមខ្លួនទទួលជើងហោះហើរអន្តរជាតិឱ្យបានកាន់តែច្រើន។
សារព័ត៌មានក្នុងស្រុកបានចុះផ្សាយថា បច្ចុប្បន្នប្រព័ន្ធហេដ្ឋារចនាសម្ព័ន្ធព្រលានយន្តហោះនៅកម្ពុជា អាចភ្ជាប់ទំនាក់ទំនងកាន់តែល្អប្រសើរជាមួយតំបន់អាស៊ីប៉ាស៊ីហ្វិក និងបណ្តាតំបន់ផ្សេងទៀត។ ទោះបីជាក្នុងរយៈពេល ៨ ខែដំបូងឆ្នាំនេះ ចំនួនអ្នកដំណើរអន្តរជាតិមានការថយចុះបន្តិចក្តី ប៉ុន្តែការដឹកជញ្ជូនទំនិញតាមផ្លូវអាកាសវិញ បែរជាមានការកើនឡើងច្រើនគួរឱ្យកត់សម្គាល់។
មន្ត្រីអាកាសចរណ៍បានបញ្ជាក់ថា កម្ពុជាកំពុងធ្វើការយ៉ាងជិតស្និទ្ធជាមួយអង្គការអាកាសចរណ៍អន្តរជាតិ ដើម្បីពង្រឹងសមត្ថភាពបច្ចេកទេសឱ្យកាន់តែជឿនលឿន ដែលជាគ្រឹះយ៉ាងសំខាន់ឆ្ពោះទៅសម្រេចគោលដៅអភិវឌ្ឍន៍ឆ្នាំ ២០៥០។ បច្ចុប្បន្ននេះ មានក្រុមហ៊ុនអាកាសចរណ៍ចំនួន ៣៣ កំពុងបើកប្រតិបត្តិការហោះហើរនៅកម្ពុជា ដោយភ្ជាប់ការធ្វើដំណើរទៅកាន់ទីតាំងជាច្រើនក្នុងតំបន់អាស៊ីអាគ្នេយ៍ អាស៊ីខាងកើត អាស៊ីខាងត្បូង និងមជ្ឈិមបូព៌ា។
