នៅភ្នំពេញ មានសណ្ឋាគារមួយឈ្មោះ យុនហ្វី (Yun Fei) ដែលមានថៅកែស្រីឈ្មោះ ស៊ូហ្វីយ៉ា ជាមនុស្សយកចិត្តទុកដាក់ខ្លាំងលើការងារ។ គាត់បានរៀបរាប់ថា ដើម្បីចូលរួមចំណែកជាមួយរដ្ឋាភិបាលក្នុងការបង្ក្រាបបទល្មើសឆបោកតាមប្រព័ន្ធអ៊ីនធឺណិត សណ្ឋាគាររបស់គាត់តែងតែក្រើនរំលឹកភ្ញៀវដែលមកស្នាក់នៅឱ្យចេះប្រុងប្រយ័ត្នខ្លួនជានិច្ច ជាពិសេសកុំជឿលើលេខទូរស័ព្ទ ឬសារចម្លែកៗដែលមើលទៅមិនគួរឱ្យទុកចិត្តឱ្យសោះ។
ទន្ទឹមនឹងនេះដែរ ខាងសមត្ថកិច្ចក៏បានដាក់ឱ្យប្រើប្រាស់នូវកម្មវិធីទូរស័ព្ទមួយឈ្មោះ "Kapea Scams" ដើម្បីជួយឱ្យប្រជាពលរដ្ឋងាយស្រួលចំណាំ និងដឹងទាន់ល្បិចកលផ្សេងៗរបស់ពួកក្រុមឆបោក។ អ្នកស្រី ស៊ូហ្វីយ៉ា បានបញ្ជាក់ថា ពួកបោកប្រាស់ឥឡូវមានល្បិចច្រើនសន្ធឹកសន្ធាប់ មិនថាតែការភូតថាឈ្នះរង្វាន់ ឬបន្លំធ្វើជាមន្ត្រីអាជ្ញាធរនោះទេ សុទ្ធតែជាការបោកប្រាស់ទាំងអស់។ បើទទួលទូរស័ព្ទប្រភេទនេះ ល្អបំផុតចុចផ្ដាច់ចោលភ្លាមតែម្ដងទៅ។
មិនតែប៉ុណ្ណោះ ថ្មីៗនេះសមត្ថកិច្ចក៏បានដាស់តឿនប្រជាពលរដ្ឋបន្ថែមទៀតថា ពួកអ្នកបោកប្រាស់អាចនឹងបន្លំធ្វើជាបងប្អូន សាច់ញាតិ មិត្តភក្តិ ឬធ្វើជាបុគ្គលិកក្រុមហ៊ុន ដោយប្រាប់ថាមានរឿងប្រញាប់ត្រូវការលុយជាបន្ទាន់។ បើជួបរឿងបែបនេះ កុំអាលស្លន់ស្លោឱ្យសោះ ត្រូវសួរនាំ និងបញ្ជាក់ឱ្យច្បាស់លាស់ជាមុនសិន។
