កាលពីថ្ងៃទី២១ ខែកញ្ញា កម្លាំងអាវុធហត្ថខេត្តបន្ទាយមានជ័យ បានចុះបង្ក្រាបភ្លាមៗនៅទីតាំងមួយកន្លែង កណ្តាលក្រុងប៉ោយប៉ែត។ ទីនោះជាធម្មតាគេចាក់សោទ្វារជិតឈឹង ដោយខាងក្នុងជាកន្លែងធ្វើសកម្មភាពឆបោកតាមប្រព័ន្ធបច្ចេកវិទ្យា។ ការចុះឆែកឆេរភ្លាមៗនេះ ឃាត់ខ្លួនមនុស្សបានរហូតដល់ ២២៣នាក់។ ពិនិត្យមើលបញ្ជីឈ្មោះឃើញថា មានច្រើនសញ្ជាតិ ក្នុងនោះជនជាតិថៃមានដល់ទៅ ១៧៤នាក់, ជនជាតិខ្មែរ ២៣នាក់ ហើយនៅសល់ប៉ុន្មានទៀតជាជនជាតិចិន បង់ក្លាដែស ឥណ្ឌូណេស៊ី ហ្វីលីពីន ឥណ្ឌា និងម៉ាឡេស៊ី។
អ្វីដែលធ្វើឱ្យអ្នកជិតខាងនិងអ្នកស្រុកប៉ោយប៉ែត ជជែកវែកញែកគ្នាច្រើនជាងគេ គឺម្ចាស់អគារទាំងពីរខ្នងនោះ។ តាមសារព័ត៌មានក្នុងស្រុកបានឱ្យដឹងថា ម្ចាស់ផ្ទះឈ្មោះ ឧក សុផាន់ ដែលមិនមែនជាមនុស្សធម្មតានោះទេ គឺជាដល់ទៅស្នងការរងនគរបាលខេត្តបន្ទាយមានជ័យឯណោះ។ ការយកផ្ទះខ្លួនឯងទៅឱ្យក្រុមឆបោកជួលបែបនេះ ដូចជាជួយជ្រោមជ្រែងពីខាងក្នុងអញ្ចឹង។ ប៉ុន្តែលើកនេះ ថ្នាក់លើមិនបណ្តោយឱ្យរួចខ្លួនឡើយ ដោយក្រសួងមហាផ្ទៃបានផ្អាកការងាររបស់លោកជាបណ្តោះអាសន្ន ហើយប្រគល់កិច្ចការឱ្យអគ្គស្នងការដ្ឋាននគរបាលជាតិ ចុះស្រាវជ្រាវបន្ត ដើម្បីវែកមុខអ្នកទទួលខុសត្រូវ និងចាត់ការតាមច្បាប់យ៉ាងម៉ឹងម៉ាត់។
នៅប៉ោយប៉ែតពេលនេះ ស្ថានការណ៍ហាក់តឹងរ៉ឹងមែនទែន។ តាមផ្លូវ គេឃើញម៉ូតូល្បាតជិះកាត់ប្រញាប់ប្រញាល់រាល់ថ្ងៃ ហុយធូលីទ្រលោម ហើយនៅតាមផ្ទះជួល និងតូបលក់អីវ៉ាន់យប់ៗ ក៏ស្ងាត់ជាងមុនច្រើនដែរ។ ពួកបងៗរត់តុកតុកតាមផ្លូវនិយាយគ្នាតៗថា លើកនេះអាជ្ញាធរធ្វើមែនទែនហើយ សូម្បីតែអ្នកខាងក្នុងក៏ជួយមិនរួចដែរ។ ដល់ពេលយប់ឡើង អ្នកស្រុកអង្គុយផឹកស៊ីជជែកគ្នានៅតាមតូបតែកាហ្វេ សុទ្ធតែរង់ចាំមើលថា តើគេនឹងស្រាវជ្រាវបន្តរហូតដល់ណាទៀត។
