កាលពីប៉ុន្មានថ្ងៃមុន រដ្ឋមន្ត្រីក្រសួងទេសចរណ៍ លោក ហួត ហាក់ និងអភិបាលខេត្តព្រះសីហនុ លោក ម៉ាង ស៊ីណេត បានអង្គុយប្រជុំជាមួយគ្នា ដោយបានប្រកាសជាផ្លូវការនូវ «ផែនការមេអភិវឌ្ឍន៍វិស័យទេសចរណ៍ខេត្តព្រះសីហនុ ឆ្នាំ២០២៦-២០៣០»។ យោងតាមថ្នាក់ដឹកនាំទាំងពីរ ក្នុងរយៈពេលប៉ុន្មានឆ្នាំខាងមុខនេះ ខេត្តព្រះសីហនុ មិនត្រឹមតែទាក់ទាញភ្ញៀវទេសចរមកលេងកម្សាន្ត និងរកស៊ីប៉ុណ្ណោះទេ ប៉ុន្តែថែមទាំងខិតខំអភិវឌ្ឍខ្លួនឆ្ពោះទៅរកការក្លាយជាទីក្រុងធំទីពីររបស់ប្រទេសកម្ពុជាផងដែរ។
បើនិយាយទៅ ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុ មានការរីកចម្រើនច្រើនគួរសមហើយ។ នៅលើគោកមានផ្លូវល្បឿនលឿនតភ្ជាប់ពីភ្នំពេញ ក្នុងសមុទ្រមានកំពង់ផែទឹកជ្រៅ និងនៅលើអាកាសមានព្រលានយន្តហោះអន្តរជាតិ ដែលធ្វើឱ្យហេដ្ឋារចនាសម្ព័ន្ធមានភាពសម្បូរបែបស្រាប់។ យោងតាមការលើកឡើងរបស់មន្ត្រីមូលដ្ឋានក្នុងអង្គប្រជុំនោះ គឺត្រូវបន្តប្រើប្រាស់បច្ចេកវិទ្យាទំនើបដូចជា បច្ចេកវិទ្យាឌីជីថល និងបញ្ញាសប្បនិម្មិត (AI) ព្រមទាំងការពង្រឹងសន្តិសុខឱ្យបានរឹងមាំ ដើម្បីធានាបាននូវសុវត្ថិភាព និងភាពកក់ក្តៅជូនដល់ភ្ញៀវទេសចរ។
ចំណែកឯមីងម្ចាស់ហាងកាហ្វេនៅទីនោះវិញ មិនបានគិតគូរពីផែនការធំដុំអីអត់ទេ ព្រោះអ្វីដែលគាត់ខ្វល់ខ្វាយជាប្រចាំថ្ងៃ គឺមនុស្សម្នាដើរហើរច្រើននៅតាមផែ និងតាមដងផ្លូវ។ មិនថាអ្នកមកធ្វើជំនួញ ឬមកដើរលេងស្រូបខ្យល់អាកាសនោះទេ ឱ្យតែក្រោមអំពូលភ្លើងតាមផ្លូវមានមនុស្សច្រើនបន្តិច ជីវភាពប្រចាំថ្ងៃរបស់ពួកគាត់ក៏មានភាពប្រសើរឡើងដែរ។ ចំពោះផែនការថ្មីនេះ តើអាចផ្លាស់ប្តូរមុខមាត់ខេត្តព្រះសីហនុបានកម្រិតណានោះ គឺត្រូវរង់ចាំមើលជាក់ស្តែងលើរបររកស៊ីរបស់បងប្អូនប្រជាពលរដ្ឋយើងនៅតាមមូលដ្ឋានក្នុងរយៈពេលប៉ុន្មានឆ្នាំខាងមុខទៀតសិន។
