អភិបាលខេត្តកណ្តាល លោក គឺ ច័ន្ទរិទ្ធា (កោះ ឈីឈុន) ទើបតែបានកោះហៅតំណាងកាស៊ីណូទាំង៥ នៅស្រុកល្វាឯម និងក្រុងអរិយក្សត្រ មកជួបប្រជុំគ្នាជាបន្ទាន់។ នៅក្នុងកិច្ចប្រជុំនោះ លោកបានដាក់បទបញ្ជាយ៉ាងម៉ឺងម៉ាត់ថា បើកាស៊ីណូណាមួយនៅតែលួចលាក់លេងល្បែងស៊ីសងអនឡាញខុសច្បាប់ ត្រូវតែបិទជាដាច់ខាតត្រឹមខែកញ្ញា ឆ្នាំ២០២៦។
ជំហររបស់អាជ្ញាធរមូលដ្ឋានគឺច្បាស់ក្រឡែតណាស់ គឺមិនបន្ធូរបន្ថយឱ្យជាដាច់ខាតចំពោះរាល់ល្បែងស៊ីសងអនឡាញទាំងអស់ ដើម្បីរក្សាសន្តិសុខសណ្តាប់ធ្នាប់តាមដងផ្លូវ និងសេចក្តីសុខសាន្តរបស់ប្រជាពលរដ្ឋ។ ចាប់ពីថ្ងៃទី១ ខែតុលា ឆ្នាំនេះតទៅ មន្ត្រីជំនាញនឹងចុះពិនិត្យតាមមូលដ្ឋានផ្ទាល់តែម្តង បើកន្លែងណាកហ៊ានល្មើសបទបញ្ជា គឺចាត់វិធានការតាមច្បាប់ភ្លាមៗ គ្មានការយោគយល់ឡើយ។ ចាប់ពីពេលនេះទៅ អាជីវកម្មល្បែងទាំងនេះ អនុញ្ញាតឱ្យបើកទទួលភ្ញៀវចូលលេងផ្ទាល់ដល់កន្លែងតែប៉ុណ្ណោះ ហាមដាច់ខាតមិនឱ្យមានការភ្នាល់តាមអនឡាញជាបន្តទៀតឡើយ។
មន្ត្រីសមត្ថកិច្ច និងអាជ្ញាធរពាក់ព័ន្ធនឹងបន្តចុះល្បាត និងស្រាវជ្រាវប្រមូលព័ត៌មានជាប្រចាំ។ យោងតាមផែនការរបស់រដ្ឋបាលខេត្ត ក្រោយខែកញ្ញាខាងមុខនេះ ខេត្តកណ្តាលត្រូវតែជាខេត្តគំរូមួយដែលគ្មានសេសសល់ល្បែងអនឡាញទាំងស្រុងតែម្តង។
