ដឹងអត់? ក្រសួងបរិស្ថានទើបតែចេញរបាយការណ៍ថ្មីទៀតហើយ។ គេថា គ្រាន់តែក្នុងខែសីហាមួយសោះ នៅតាមតំបន់ការពារធម្មជាតិ មានបទល្មើសបំផ្លាញធនធានធម្មជាតិរហូតដល់ទៅ ១៥៧ ករណីឯណោះ គឺកើនឡើង ១០ ករណីបើធៀបនឹងខែកក្កដា។ ស្ដាប់ទៅឃើញថា ក្រុមជនខិលខូចទាំងនោះនៅតែមិនទាន់រាតដៃសោះ។
ក្នុងចំណោមបទល្មើសទាំងអស់ហ្នឹង ច្រើនជាងគេគឺរឿងកាប់ឈើ មានរហូតដល់ ៦៧ ករណី។ បន្ទាប់មកគឺបទល្មើសទាក់ទាក់ ឬចាប់សត្វព្រៃ ៤០ ករណី, លួចកាប់ឆ្ការទន្ទ្រានយកដី ៣៣ ករណី, បទល្មើសជលផល ១៦ ករណី ហើយថែមទាំងមានករណីធ្វើអាជីវកម្មរ៉ែខុសច្បាប់ ១ ករណីទៀតផង។ ក្នុងខែនោះ មន្ត្រីជំនាញបានចុះល្បាតជាង ១.២០០ លើក ហើយបានរកឃើញដីព្រៃជិត ៤៨ ហិកតាត្រូវគេកាប់ឆ្ការ ដោយក្នុងនោះដីជាង ២០ ហិកតា ត្រូវបញ្ជូនសំណុំរឿងទៅតុលាការរួចហើយ។ ឃើញព្រៃឈើ និងដីធ្លីត្រូវគេបំផ្លាញបែបនេះ ពិតជាស្ដាយជំនួសណាស់!
តាមព័ត៌មានថា មាន ៦៩ ករណីត្រូវបានកសាងសំណុំរឿងជាផ្លូវការ ហើយក្នុងនោះមាន ៦ ករណី ពាក់ព័ន្ធមនុស្ស ៨ នាក់ ត្រូវបានបញ្ជូនទៅតុលាការចាត់ការតាមច្បាប់រួចរាល់ហើយ។ ដើម្បីកាន់តែមានប្រសិទ្ធភាពក្នុងការបង្ក្រាប គេបានរៀបចំវគ្គបណ្តុះបណ្តាលនៅតាមខេត្តមួយចំនួន ដោយបង្រៀនមន្ត្រីឧទ្យាននុរក្សពីរបៀបកត់ត្រា វិធីស៊ើបអង្កេត ស្រាវជ្រាវប្រមូលភស្តុតាង ហើយសូម្បីតែជំនាញស៊ើបអង្កេតបទល្មើសលាងលុយកខ្វក់ក៏មានបង្រៀនដែរ។ មើលទៅ លើកនេះខាងក្រសួងពិតជាប្រឹងប្រែង និងយកចិត្តទុកដាក់ខ្លាំងមែនទែន ក្នុងការការពារបរិស្ថានរបស់យើង។
