លើកនេះ ប៉ូលិសនៅខេត្តឆាត់ឆើងសៅ (Chachoengsao) ប្រទេសថៃ ធ្វើការលឿនគួរសម ដោយបានស្ទាក់ចាប់រថយន្តភីកអាប់មួយគ្រឿង ដែលបើកមកពីព្រំដែនកម្ពុជា-ថៃ នៅលើផ្លូវជាតិ។ អ្នកបើកបរឈ្មោះ Thotsaphon អាយុ ៣៧ឆ្នាំ ជាជនជាតិថៃ ទើបតែចេញពីគុកមិនទាន់បានប៉ុន្មានផង ក៏ត្រឡប់មកស៊ីឈ្នួលដឹកមនុស្សខុសច្បាប់ដដែល។ នៅទ្រុងខាងក្រោយរថយន្ត ប៉ូលិសបានប្រទះឃើញបុរសជនជាតិចិន ៤នាក់ ប្រឡាក់ភក់ពេញខ្លួន មើលទៅកំសត់ណាស់ ដូចទើបតែវារចេញពីភក់មកអញ្ចឹង។
សារព័ត៌មានក្នុងស្រុកថៃបានឲ្យដឹងថា អ្នកបើកឡានរូបនេះបានសារភាពយ៉ាងស្រួលៗថា រូបគេធ្លាប់ជាប់គុកដោយសាររឿងរត់ពន្ធមនុស្សអញ្ចឹងដែរ។ លើកនេះ គេព្រមព្រៀងគ្នាក្នុងតម្លៃ ៣.០០០បាត ក្នុងម្នាក់ ដូច្នេះ ៤នាក់ ទទួលបាន ១២.០០០បាត។ ចំណែកជនជាតិចិន ៤នាក់នោះវិញ ក៏ជិះកាត់ឧបសគ្គមិនតិចដែរ ដោយពួកគេបានរៀបចំចេញពីស្រុកចិន មកដល់ក្រុងប៉ោយប៉ែត ប្រទេសកម្ពុជា ដោយអស់លុយម្នាក់ៗពី ៣.០០០ ទៅ ៥.០០០ដុល្លារអាមេរិក។ បំណងដើម គឺចង់កាត់តាមថៃ ដើម្បីបន្តទៅស្រុកភូមា ប៉ុន្តែអកុសល ត្រូវមកជួបគ្រោះថ្នាក់កណ្តាលផ្លូវ នៅខេត្តឆាត់ឆើងសៅនេះតែម្តង។
និយាយតាមត្រង់ទៅ រកស៊ីចិញ្ចឹមជីវិតឥឡូវមិនងាយស្រួលទេ ប៉ុន្តែបើហ៊ានដើរផ្លូវកាត់ខុសច្បាប់បែបនេះ គឺប្រឈមនឹងហានិភ័យធំណាស់។ ពេលនេះ ទាំងអ្នកបើកឡាន ទាំងអ្នកលួចឆ្លងដែនទាំង ៤នាក់ ត្រូវប៉ូលិសឃាត់ខ្លួនទាំងអស់ ហើយតាមនីតិវិធី ជនជាតិចិនទាំងនេះនឹងត្រូវគេបណ្តេញចេញត្រឡប់ទៅវិញ។ ឃើញឡានភីកអាប់បើកឆ្លងកាត់តាមផ្លូវរាល់ថ្ងៃ នរណាទៅដឹងថា នៅក្នុងនោះមានដឹកមុខរបរអីខ្លះទៅ?
