កាលពីថ្ងៃទី១៩ ខែកញ្ញា កម្លាំងបញ្ជាការឯកភាពខណ្ឌដង្កោ បានចុះឆែកឆេររដ្ឋបាលរកជនបរទេសនៅផ្ទះល្វែងមួយកន្លែង លេខ២៥B ផ្លូវ០២B ស្ថិតក្នុងភូមិម៉ូល សង្កាត់ដង្កោ ខណ្ឌដង្កោ រាជធានីភ្នំពេញ។ លុះពេលសមត្ថកិច្ចរុញទ្វារចូលទៅ ទើបបែកការណ៍ថា ផ្ទះជួលនេះមិនមែនសម្រាប់ស្នាក់នៅធម្មតាឯណា គឺលួចធ្វើសកម្មភាពឆបោកតាមប្រព័ន្ធអ៊ីនធឺណិតយ៉ាងស្ងាត់ៗ។ ក្នុងប្រតិបត្តិការនោះ សមត្ថកិច្ចបានឃាត់ខ្លួនមនុស្ស ៩នាក់ភ្លាមៗនៅនឹងកន្លែង ដែលទាំងអស់គ្នាសុទ្ធតែជាជនជាតិបង់ក្លាដែស។
បណ្តាញព័ត៌មានក្នុងស្រុកបានឱ្យដឹងថា សមត្ថកិច្ចរឹបអូសបានសម្ភារធ្វើសកម្មភាពមួយចំនួន រួមមានកុំព្យូទ័រ All-in-One ចំនួន ៦គ្រឿង ទូរស័ព្ទដៃ ១៥គ្រឿង ព្រមទាំងលុយដុល្លារក្លែងក្លាយមួយចំនួនទៀត។ ឥឡូវនេះ ជនសង្ស័យទាំង ៩នាក់ រួមនិងវត្ថុតាង ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីរៀបចំសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់។
នៅម្ដុំនោះមានផ្ទះជួលច្រើន ឲ្យតែបិទទ្វារផ្ទះល្វែងជិត ទាញវាំងននបាំងបាត់ គឺអ្នកក្រៅមើលមិនធ្លុះឡើយ ទោះជាអ្នកលក់ដូរតាមចិញ្ចើមផ្លូវមានបរិយាកាសកកកុញយ៉ាងណាក៏ដោយ។ ឯសំឡេងម៉ូតូបើកបរចេញផ្សែងទ្រហឹងពេញផ្លូវ ក៏មិនអាចបាំងបិទសកម្មភាពក្រុមសម្ងំក្នុងផ្ទះដែលខំប្រឹងកែច្នៃលុយក្លែងក្លាយ និងធ្វើអំពើឆបោកតាមអនឡាញបានដែរ ចុងក្រោយនៅតែគេចមិនផុតពីកណ្តាប់ដៃសមត្ថកិច្ចដែលចុះបង្ក្រាបភ្លាមៗនោះឡើយ។
