ថ្ងៃនេះ (ថ្ងៃទី ២៣ ខែកញ្ញា) ប្រហែលម៉ោង ១១ ព្រឹក មានការភ្ញាក់ផ្អើលបន្តិចនៅម្ដុំស៊ូបាំង (Subang) ក្នុងរដ្ឋស៊ីឡាំងហ្គ័រ (Selangor)។ បងប្អូនដែលកំពុងធ្វើការ និងអ្នកធ្វើដំណើរឆ្លងកាត់ទីនោះ បានឃើញរថយន្តនគរបាល និងរថយន្តតម្រួតអន្តោប្រវេសន៍ជាច្រើនគ្រឿង បើកតម្រង់ជួរឆ្ពោះទៅម្ដុំនោះ។ អ្នកស្រុកអ្នកភូមិ និងបងប្អូននៅជិតៗនោះ បានប្រាប់តៗគ្នា ឱ្យអ្នកធ្វើការ និងរស់នៅក្បែរនោះ ប្រុងប្រយ័ត្ន និងតាមដានស្ថានការណ៍ជុំវិញខ្លួន។
ឯរឿងថា អាជ្ញាធរចុះប្រតិបត្តិការនៅចំណុចណាច្បាស់លាស់ ឬបង្ក្រាបលើរឿងអ្វីនោះ គឺទល់ពេលនេះមិនទាន់មាននរណាដឹងច្បាស់នៅឡើយទេ។ មិនដឹងថា ចុះបង្ក្រាបពួកក្រុមឆបោកតាមប្រព័ន្ធអ៊ីនធឺណិត ឬមួយក៏គ្រាន់តែជាការចុះពិនិត្យឯកសារ ច្បាប់ទម្លាប់ធ្វើការរបស់ពលកររៀបរយធម្មតានោះទេ មានតែរង់ចាំព័ត៌មានផ្លូវការពីខាងអាជ្ញាធរជម្រាបបន្ថែម។ អ្នកមកធ្វើការនៅស្រុកគេ ស្វែងរកស៊ីទាំងលំបាក អ្វីដែលភ័យជាងគេ គឺខ្លាចតែមានបញ្ហាឯកសារ ឬហេតុការណ៍ចៃដន្យណាមួយមកជះឥទ្ធិពលដល់ការរស់នៅ។
រស់នៅឆ្ងាយស្រុកកំណើត បំណងធំរបស់ពួកយើង គឺសុំត្រឹមសុខសាន្ត។ ឥឡូវនេះ ស្ថានការណ៍មិនទាន់ច្បាស់លាស់នៅឡើយ ដូច្នេះបងប្អូនដែលជួលផ្ទះ ធ្វើការ ឬបើករបររកស៊ីនៅម្ដុំស៊ូបាំង ក្នុងរយៈពេលពីរថ្ងៃនេះ ពេលចេញក្រៅផ្ទះ សូមកុំភ្លេចយកលិខិតឆ្លងដែន (Passport) និងទិដ្ឋាការ (Visa) ឬឯកសារច្បាប់ទម្លាប់ផ្សេងៗតាមខ្លួនឱ្យបានត្រឹមត្រូវ។ បើជួបអាជ្ញាធរត្រួតពិនិត្យតាមផ្លូវ កុំអាលភ័យស្លន់ស្លោ ឱ្យតែយើងមានឯកសារគ្រប់គ្រាន់ គឺដើរដោយទំនុកចិត្ត និងបន្តរស់នៅដោយស្ងប់ចិត្តទៅបានហើយ។
