នៅក្រុងអ៊ីស្លាម៉ាបាដ ប្រទេសប៉ាគីស្ថាន មានរឿងភ្ញាក់ផ្អើលធំមួយបានកើតឡើង។ ខាងនាយកដ្ឋានប្រឆាំងបទល្មើសតាមអ៊ីនធឺណិតបានបើកប្រតិបត្តិការក្តៅៗ ដោយចុះទៅឆ្មក់ឆែកឆេរទីតាំងខលសេនធ័រ (Call Center) មួយកន្លែងនៅក្នុងតំបន់ E11/3។ ការចុះបង្ក្រាបលើកនេះធ្វើឡើងយ៉ាងល្អិតល្អន់ ដោយឃាត់ខ្លួនមនុស្សបានជាង ១០០ នាក់ ហើយសកម្មភាពចុះបង្ក្រាបនោះទៀតសោត មានភាពអ៊ូអររហូតផ្អើលដល់អ្នកនៅផ្លូវជិតខាងឯណោះ។
ប្រព័ន្ធផ្សព្វផ្សាយក្នុងស្រុកបានឱ្យដឹងថា កម្លាំងសមត្ថកិច្ចបានវាយឆ្មក់ចូលចំគោលដៅ ធ្វើឲ្យអ្នកនៅខាងក្នុងភ័យស្លន់ស្លោដៃជើង និងបាក់មុខតែម្តង។ មន្ត្រីបានបញ្ជាក់ថា ប្រតិបត្តិការទាំងមូលគឺធ្វើឡើងដើម្បីបង្ក្រាបបទល្មើសបច្ចេកវិទ្យា ដោយបានកម្ទេចសំបុកបោកប្រាស់មួយនេះចោលទាំងស្រុង។ ជាទូទៅ ទីតាំងខលសេនធ័របែបនេះតែងតែបិទទ្វារជិតឈឹង ខាងក្នុងមានកុំព្យូទ័ររាប់សិបទៅរាប់រយគ្រឿងបើកភ្លើងព្រាត ដែលអ្នកខាងក្រៅមើលមិនធ្លុះ និងមិនដឹងថាគេធ្វើអីឡើយ។
ទីតាំងខលសេនធ័រដែលលួចលាក់ក្នុងតំបន់ប្រជុំជនបែបនេះ ដល់យប់ឡើងតែងតែបើកភ្លើងភ្លឺ ហើយមានយុវជនពាក់កាសត្រចៀក ចេញចូលធ្វើការវេនយប់ទាំងយប់អធ្រាត្រ និងហូបបាយប្រអប់នៅកន្លែង។ ពេលនេះ នៅតាមតូបតែជិតៗនោះ ក៏មានអ្នកអង្គុយជជែកគ្នាដែរថា ឥឡូវនៅកន្លែងណាក៏គេបង្រ្កាបរឿងបែបហ្នឹងដែរ ស្មានតែជួលផ្ទះស្ងាត់ៗអាចលួចធ្វើស៊ីបានស្រួល ប៉ុន្តែដល់ពេលឡានប៉ូលិសមកដល់ ហើយកាត់សោទ្វារបុកចូលភ្លាម គ្មាននរណាម្នាក់រត់រួចឡើយ។
