ព្រឹកព្រលឹមស្រាងៗថ្ងៃនេះ មានការភ្ញាក់ផ្អើលមួយបានកើតឡើងនៅក្រុងសិរីសោភ័ណ ខេត្តបន្ទាយមានជ័យ។ កម្លាំងសមត្ថកិច្ចបានចុះឆែកឆេរឆ្មក់ទីតាំងផ្ទះជួលមួយកន្លែងនៅតាមដងផ្លូវ ហើយបានបង្ក្រាបសម្បុកក្រុមឆបោកតាមប្រព័ន្ធអ៊ីនធឺណិតមួយកន្លែង។ ក្នុងប្រតិបត្តិការនោះ សមត្ថកិច្ចឃាត់ខ្លួនមនុស្ស ៣ នាក់នៅនឹងកន្លែង ក្នុងនោះមានស្រ្តី ២ នាក់។
វត្ថុតាងដែលដកហូតបាននៅកន្លែងកើតហេតុមាន កុំព្យូទ័រ All-in-One ចំនួន ៣ គ្រឿង និងទូរស័ព្ទដៃ ៣ គ្រឿង។ បច្ចុប្បន្ន ទាំងជនសង្ស័យទាំងវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាល ដើម្បីចាត់ការតាមនីតិវិធីច្បាប់ហើយ។ នៅទីនោះ ផ្ទះជួលតាមច្រកល្ហករបៀបនេះ ឱ្យតែបិទទ្វារជិត សូម្បីតែអ្នកជិតខាងអង្គុយហូបអាហារពេលព្រឹកនៅក្បែរហ្នឹង ក៏មិនប្រាកដថាដឹងថាមនុស្សខាងក្នុងលួចធ្វើសកម្មភាពអីខ្លះផង។
បន្ទាប់ពីឆែកឆេរទីតាំងទីមួយរួច សមត្ថកិច្ចមិនទាន់សម្រាកទេ បានបន្តស្រាវជ្រាវទៅឆែកឆេរទីតាំងសង្ស័យ ២ កន្លែងទៀតភ្លាមៗ។ ប៉ុន្តែ ២ កន្លែងក្រោយនេះ មិនមានឃើញអ្វីខុសប្រក្រតីនោះឡើយ។ អំឡុងពេលដែលសមត្ថកិច្ចកំពុងរឹតបន្តឹងការបង្ក្រាបយ៉ាងក្តៅគគុកបែបនេះ ប្រហែលជាធ្វើឱ្យពួកខិលខូចដែលលួចលាក់ខ្លួនតាមកន្លែងផ្សេងៗ កំពុងតែភ័យបុកពោះមិនស្ទើរទេ។
