នៅរសៀលថ្ងៃនេះ អ្នកសារព័ត៌មានជាតិ និងអន្តរជាតិសរុប ៧៩ នាក់ មកពី ៣៩ ស្ថាប័ន បានចុះទៅមើលទីតាំងផ្ទាល់នៅអតីតកាស៊ីណូ "Jin Yin He" ក្នុងក្រុងបាវិត ខេត្តស្វាយរៀង។ ក្រុងបាវិតជាតំបន់ជាប់ព្រំដែន ដែលធម្មតាអ៊ូអរដោយសំឡេងម៉ូតូ និងផ្សែងហុយចេញពីតូបលក់ដូរតាមចិញ្ចើមផ្លូវ ហើយអគារមួយនេះក៏ស្ថិតនៅចំកណ្ដាលភាពអ៊ូអរនោះដែរ។
និយាយពីប្រវត្តិអគារនេះ ម្ចាស់អគារជាជនជាតិចិនឈ្មោះ Hong Xingju ហើយគាត់បានជួលបន្តទៅឲ្យក្រុមជនជាតិវៀតណាម។ ក្រុមនេះបានប្រើប្រាស់ទីតាំងខាងលើ ដើម្បីធ្វើសកម្មភាពឆបោកតាមប្រព័ន្ធអ៊ីនធឺណិត។ បើតាមប្រភពព័ត៌មានក្នុងស្រុក កម្លាំងសមត្ថកិច្ចកម្ពុជាបានចុះបង្ក្រាប និងបោសសម្អាតទីតាំងនេះទាំងស្រុង កាលពីថ្ងៃទី ៧ ខែមេសា កន្លងទៅ។
ការចុះទៅមើលដល់ទីតាំងផ្ទាល់របស់អ្នកសារព័ត៌មានលើកនេះ បានធ្វើឲ្យគេឃើញច្បាស់ពីទិដ្ឋភាពពិតប្រាកដនៅខាងក្នុង។ ឯអ្នកស្រុកនៅម្ដុំនោះវិញ នៅតាមបន្ទប់ជួល និងតូបតែតាមចិញ្ចើមផ្លូវ ក៏កំពុងតែជជែកគ្នាលេងពីជុំវិញរឿងសមត្ថកិច្ចចុះបង្ក្រាបទីតាំងឆបោកទាំងនេះដែរ។ ការបើកឲ្យអ្នកកាសែតចូលមើល និងថតរូបដល់ក្នុងអគារបែបនេះ ធ្វើឲ្យគ្រប់គ្នាកាន់តែភ្លឺភ្នែក និងដឹងច្បាស់ថាតើមានរឿងអ្វីកើតឡើងពិតប្រាកដនៅទីនោះ។
